HīAko

HīAko explores the idea of learning through play and awakening the potential within

Kia hīanga te ako!
Atua, tipua, tawhito, tangata
Ngā Koha Atua
Tuku atu, tuku mai
Me ko Māui tonu koe
HīAko tuku atu, HīAko tuku mai,
e ko HīAko e - Hi!

Tirohanga whānui

Ko HīAko tētehi tauwhāinga e whakahaerehia ana i runga i te kaupapa Māori, ā, he kaupapa e akiaki nei i ngā ākonga ki te hīraurau i ngā raruraru tūturu o ia rā e whai tikanga ana ki a rātou. He wero pārekareka, he wero taumāhekeheke anō hoki e toro ana ki ngā whānau, ngā kura, ngā hapū, me ngā iwi. Ko te whāinga matua o HīAko, kia whakamahia te pakirehua e Hī mai ai te Ako i ngā ākonga, arā, kia hī mai ai ngā pūmanawa me ngā pūkenga auaha hei ārahi i a rātou ā haere ake nei. 

I ahu mai a HīAko i ēnei huarahi ako Māori e whā:

  • Kia hīanga te ako
  • Kia tamaiti te tū, kia Māori te tū
  • Mā te tamaiti tōna ao e hanga
  • Ko te tamaiti ko tōna whānau, ko te whānau ko tōna tamaiti.

Wāhanga tuatahi

He kauhaurangi ngaio mā ngā kaiako hei ārahi i ngā ākonga ki te whakaaroaro, ki te whakaauaha me te hīraurau hopanga anō hoki, kia kitea te whakataunga. Ko tā tēnei kauhaurangi kotahi hāora te roa he whakamārama i ngā ariā o tēnei tauwhāinga kaupapa Māori me ngā putanga mō HīAko i mua i te tīmatatanga o te tauwhāinga.

Wāhanga tuarua

He tauwhāinga, e rua rangi te roa. Ko tōna aronga kia whakaterengia ngā putanga ako.

Rangi tuatahi

Hei te rangi tuatahi, ka whakatenatenahia ngā ākonga ki te whakaaroaro ki ngā raruraru tūturu o ia rā e whai tikanga ana ki a rātou, kātahi ka kimi whakataunga. Mā ngā kaihuawaere o Tātai Aho Rau ngā ngohe whakamanawa me ngā kēmu whakapakari tīma e whakahaere i tētehi horopaki whakaihiihi, kia puāwai ai ngā ākonga me ō rātou pūkenga. Ka whakaatu ngā ākonga i ō rātou whakaaro ki ngā kaiwhirinaki nō te ao ahumahi, kia whai urupare ai. Mā reira e āhei ai ngā ākonga ki te whakawhānui i ō rātou ariā, ki te whakawhanake hoki i ā rātou whakataunga.

Rangi tuarua

Hei te rangi tuarua, ka mahi tonu ngā ākonga mā te whai i tētehi tukanga whakahoahoa kia whakawhanakehia ō rātou whakataunga ki ngā raruraru. Hei whakakapi ake i te tauwhāinga nei, ka whakaaturia anō e ngā ākonga ā rātou whakataunga whakamutunga ki mua ki te aroaro o tētahi pae kaiwhiriwhiri. Koinei te wā ka tae atu ngā whānau, ngā hapū, ngā iwi, me te hapori whānui kia whakamanawatia ngā ākonga me ā rātou kohinga whakaaro.

Mā wai tēnei kaupapa?

Mā ngā ākonga tau 6–8 o ngā Kura Kaupapa Māori, ngā Kura ā-Iwi, ngā Kura/Akomanga Rumaki, me ngā Kura/Akomanga Reo Rua.