HīAko

HīAko explores the idea of learning through play and awakening the potential within

Tags: Māori Medium, Year 7-10

Kia hīanga te ako!
Atua, tipua, tawhito, tangata
Ngā Koha Atua
Tuku atu, tuku mai
Me ko Māui tonu koe
HīAko tuku atu, HīAko tuku mai,
e ko HīAko e - Hi!

Tirohanga whānui

Ko HīAko tētehi tauwhāinga e whakahaerehia ana i runga i te kaupapa Māori, ā, he kaupapa e akiaki nei i ngā ākonga ki te hīraurau i ngā raruraru tūturu o ia rā e whai tikanga ana ki a rātou. He wero pārekareka, he wero taumāhekeheke anō hoki e toro ana ki ngā whānau, ngā kura, ngā hapū, me ngā iwi. Ko te whāinga matua o HīAko, kia whakamahia te pakirehua e Hī mai ai te Ako i ngā ākonga, arā, kia hī mai ai ngā pūmanawa me ngā pūkenga auaha hei ārahi i a rātou ā haere ake nei. 

I ahu mai a HīAko i ēnei huarahi ako Māori e whā:

  • Kia hīanga te ako
  • Kia tamaiti te tū, kia Māori te tū
  • Mā te tamaiti tōna ao e hanga
  • Ko te tamaiti ko tōna whānau, ko te whānau ko tōna tamaiti.

Wāhanga tuatahi

E rua ngā kauhaurangi akoranga – tētahi mā ngā kaiako/kaihāpai, tētahi mā ngā ākonga.

Ko te kauhaurangi tuatahi mā ngā kaiako hei ārahi i ngā ākonga ki te whakaaroaro, ki te whakaauaha me te hīraurau hopanga anō hoki kia kitea te whakataunga. Ko tā tēnei kauhaurangi kotahi hāora te roa he whakamārama i ngā ariā o tēnei tauwhāinga kaupapa Māori me ngā putanga mō HīAko i mua i te tīmatatanga o te tauwhāinga.

Ko te kauhaurangi tuarua mā ngā ākonga ki te hono, ki te whakatōmene hoki i te paetukutuku o HīAko. He wā whakatika hoki i ngā raru matihiko, ina hiahiatia.

Wāhanga tuarua

He tauwhāinga, e toru ngā rā, ka tīmata mai te 9.15 i te ata ki te 12.30 i te ahiahi te roa.  Ko te rangi whakamutunga kua whakataha ake mō te whakaaturanga. Ko te aronga matua  mō ngā rā  e whā kia whakaterea ngā putanga ako.

Rangi tuatahi

Hei te rangi tuatahi, ka whakatenatenahia ngā ākonga ki te whakaaroaro ki ngā raruraru tūturu o ia rā e whai tikanga ana ki a rātou, kātahi ka kimi whakataunga. Mā ngā kaihuawaere o Tātai Aho Rau ngā ngohe whakamanawa me ngā kēmu whakapakari tīma e whakahaere i tētehi horopaki whakaihiihi, kia puāwai ai ngā ākonga me ō rātou pūkenga. Ka whakaatu ngā ākonga i ō rātou whakaaro ki ngā kaiwhirinaki nō te ao ahumahi kia whai urupare ai. Mā reira e āhei ai ngā ākonga ki te whakawhānui i ō rātou ariā, ki te whakawhanake hoki i ā rātou whakataunga.

Rangi tuarua/tuatoru

Hei te rangi tuarua, ka mahi tonu ngā ākonga mā te whai i tētehi tukanga whakahoahoa kia whakawhanakehia ō rātou whakataunga ki ngā raruraru.

Rangi tuawhā

Hei whakakapi ake i te tauwhāinga nei, ka whakaaturia anō e ngā ākonga ā rātou whakataunga whakamutunga ki mua ki te aroaro o tētahi pae kaiwhiriwhiri. Koinei te wā ka tae atu ngā whānau, ngā hapū, ngā iwi, me te hapori whānui kia whakamānawatia ngā ākonga me ō rātou kohinga whakaaro.

Mā wai tēnei kaupapa?

Mā ngā ākonga tau 6–8 o ngā Kura Kaupapa Māori, ngā Kura ā-Iwi, ngā Kura/Akomanga Rumaki, me ngā Kura/Akomanga Reo Rua.

Ngā rangi kauhaurangi

  • Wāhanga 2: 17-20th Mei 2022
  • Wāhanga 2: 27-30 Hune 2022

Ki te hiahia koe kia tae atu ō ākonga ki tēnei kaupapa, tēnā whakapā atu ki a Alicia, ki a Hoana rānei kei raro iho nei.