Pīkau 21: Te Tuhiwaehere Tukurua
He aha te Tukuruatanga?
Kōrero Whakamārama
I tēnei hākoritanga ka whakamāramatia te Tukuruatanga e Darielle Bell, Kaihuawaere nō Kia Atamai Educational Trust.
Ko te tukuruatanga tētahi o ngā āhuatanga nahanaha e toru o te tuhiwaehere. Ko te raupapanga, ko te tīpakonga me te tukuruatanga ngā āhuatanga e toru e kōrerohia ana.
Mā te tuhiwaehere ka hanga te kaituhi waehere i tētahi papatono. Ko tā te papatono he tohutohu ki te rorohiko ka pēhea te whakatutuki i ngā otinga e manakohia ana e te kaituhi waehere.
Nō reira, ko te waehere nahanaha he momo poro hei hanga i te papatono. Mā te whakamahi i te waehere nahanaha ka whāiti ai ngā rārangi o te papatono, ka tere ake hoki te whakatutuki o te papatono i ngā hiahia o te kaiwhakamahi.
Te Tuhiwaehere Tukurua
Kōrero Whakamārama
I tēnei kauhaurangi ka tirohia e tātou tētahi ngohe tuhiwaehere tukurua e whakatauira ana i ngā ariā matua e rua o te tuhiwaehere nahanaha.
I tēnei ngohe ka aro tātou ki te raupapanga me te tukuruatanga o tētahi waehere āhua.
Tirohia te waehere āhua nei. Kua āta raupapatia ngā āhua, ā, kua tukuruatia tētahi wāhanga o te tuhiwaehere kia hangaia te waehere katoa.
Āta whakaarohia tēnei pātai: Ko tēhea te āhua e whai ake ana?
He aha koe i whakaaro pēnā ai?
He maha ngā whakautu e taea ana engari ko te hiahia kia āta parahautia e te tangata tāna ake whakautu.
Nō reira, he aha ngā hononga o tēnei ngohe ki wāhanga ako kē?
Ko te raupapanga me te tukuruatanga ētahi tino ariā o te pāngarau me te reo matatini hoki. He aha ngā hononga ki ngā akoranga whānui o te ao Māori? He hononga ki ngā toi Māori?
He aha atu? Āta whakaarohia ngā hononga ki ngā akoranga whānui o tō ake ao ako.
He Ngohe: Te Tuhiwaehere Tukurua
Kōrero Whakamārama
I tēnei ataata ka tirohia e ngā kaihuawaere o Kia Takatū ā-Matihiko tētahi ngohe tuhiwaehere tukurua. Ka kōrerotia e Whare rāua ko Greg ētahi o ngā āhuatanga o te waehere me ō rāua whakaaro e pā ana ki te āhua ka whai ake.
I a koe e mātakitaki ana whakaarohia tētahi wā pai hei kawe i tēnei ngohe ki te taha o ōu hoa mahi.
Ngā Kōkiritanga
E toru ngā kōkiritanga hei whakatinana i ngā akoranga o roto i tēnei pīkau.
Ko te tuatahi: Kia whakarite wā i ngā rā e whitu e heke mai nei hei whakahaere i tētahi ngohe hangarau matihiko i tō kura. Pāwhiria te hononga nei mō tētahi rauemi tautoko.
Ko te tuarua: Kia whakauru atu i ēnei akoranga ki te wātaka hui ā-kaiako, hui ā-whānau rānei. Pāwhiria te hononga nei mō tētahi panahiko me tētahi rauemi tautoko.