Pīkau 10: Te Whakamātautau ā-Kaiwhakamahi
Te Wheako ā-Kaiwhakamahi
Kōrero Whakamārama
I tēnei hākoritanga ka kōrerotia ngā hipanga kua whakatakotoria hei whai i a koe e whakamahi ana i tētahi taupānga, i tētahi pūrere rānei. Kia kōrero wheako ā-kaiwhakamahi tātou, te UX rānei, he aha rawa ia?
Ko tērā e kōrerohia ana ko ngā āhuatanga ka rangona e te kaiwhakamahi i a ia e whakamahi ana i tētahi mea. E kōrero ana tātou mō ngā hipanga kua whakatakotoria hei whai mā rātou i a rātou e whakamahi ana i tētahi taupānga, i tētahi pūrere rānei.
Ki te aro tātou ki te nui o ngā hipanga, ngā wā rānei ka pāwhiria tētahi mea, e tika ana kia whāia kia whakatutukihia tētahi mahi, ka kitea pea he ara poto ake, māmā ake hoki ki te whakatutuki i ētahi mahi me tētahi taupānga, tētahi pūrere rānei ka rite tonu te mahia.
Whakaarohia tētahi taupānga kātahi nei ka whakamahi me te take i whakamahia. E hia katoa ngā wā i pāwhiri, i miri, i panuku rānei i te taupānga kia tatū atu koe ki te wāhi, ki te mahi hoki i hiahiatia? He ara māmā ake, tere ake rānei ki te whakatere i te taupānga? Mēnā i a koe te āheinga ki te panoni i te taupānga, he aha ngā āhuatanga ka panonihia?
Te Take, te Aha me te Ara
Kōrero Whakamārama
I tēnei kauhaurangi ka kōrerotia te pāhekohekotanga o te tangata me te rorohiko (HCI) i te waihangatanga o tētahi hoahoatanga angitu ko te kaiwhakamahi kei tōna pūtake.
E toru ngā wāhanga matua o te UX, arā, te wheako ā-Kaiwhakamahi:
- Te Take - ko tāna he whakatenatena i te kaiwhakamahi ki te whakaaro ki te take e hiahiatia ana tētahi mea.
- Te Aha - ko tāna he whakaatu he aha tana mahi, ka whakaāhei hoki i te aha.
- Te Ara - ko tāna he whakaatu ka pēhea tana whakatutuki i tētahi mahi.
Ka āta whakaaro ngā kaihoahoa wheako ā-kaiwhakamahi ki ā rātou kaiwhakamahi, ki ō rātou hiahia, ō rātou uaratanga, ō rātou pūkenga me ā rātou tepenga hoki.
Ka aro hoki aua kaihoahoa ki ngā āhuatanga nā reira e kounga ake ai te whakamahinga o tētahi hua, o tētahi ratonga matihiko rānei e ngā kaiwhakamahi.
Āta whakaaro ki tētahi taupānga kua whakamahia e koe inā tata nei. I waingōhia māu te whakamahi? I mārama ngā kuputuhi? I mate koe ki te panuku kia kitea ōu hiahia?
Te whakamātautau ā-kaiwhakamahi
Kōrero Whakamārama
I tēnei ataata ka titiro ngā tamariki ki ētahi hangarau. He hangarau matihiko ētahi he ahanoa taupētonu, he ahanoa momotu hoki te toenga. Ka tūhura rātou i te ngāwari me te kounga o te whakamahi.
Ka mōhio ngā ākonga me pēhea te whakamahi i te ahanoa mā te tirotiro me te raweke noa iho? Ka pānui tohutohu whakamahi rānei?
Ka āta titiro hoki rātou ki ngā āhuatanga hoahoa wheako ā-kaiwhakamahi. Ka whakaaro rātou ki ēnei pātai:
- He aha i mahi ai, he aha rānei i kore ai e mahi?
- Ki te kōrero koe ki te kaihoahoa, he aha āu pātai, āu urupare rānei ki a ia?